RIWAYAT GESANG RA. KARTINI

Riwayat Geasangipun Raden Ajeng Kartini

Raden Ajeng Kartini mijil wonten bumi Jepara, tanggal 21 April taun 1879. Raden Ajeng Kartini menika putri Wedana Mayong nun inggih Raden Mas Adipati Sosroningrat. Dene ingkang biyung inggih menika garwa ampilipun ingkang asma M.A. Ngasirah. Kartini menika wayah saking Bupati Demak asma Tjondronegoro. Kanthi dhasar “lingkungan” kulawarga priyayi ingkang berpendhidhikan menika, Kartini tuwuh lan diwasa kanthi kebak raos kritis saengga ndadosaken panjenenganipun grengseng merjuangaken nasib wanita.

Nalika tasih timur, Raden Ajeng Kartini kaparingan kalodhangan sekolah wonten ELS utawi Europese Lagere School. Wonten ing pawiyatan, panjenenganipun nyinau maos, nyerat, saha nyinau basa Walandi. Ananging, ngancik yuswa 12 taun, RA Kartini boten angsal nglajengaken sekolahipun. Panjenenganipun dipunpingit kados adatipun lare putri ing jaman menika. Mila saking menika Kartini mundhut pirsa dhumateng Ramanipun “Bapa, kenging menapa Kartini mboten pikantuk nglajengaken sekolah? Kenging menapa Kartini kedah enggal-enggal dipunpingit? Kartini taksih kepingin nglajengaken sekolah Bapa.” Kaliyan swanten ingkang lirih Ramanipun lajeng paring wangsulan. “Ndhuk, anakku cah ayu, pancen kekarepanmu mulya. Nanging, ngertia adat budaya leluhur kene. Tampanen kanti ati kang legawa ya Ndhuk.” Kartini nangis ngguguk amargi gela kaliyan kahanan menika.

Sinaosa dipunpingit, boten ateges Kartini mandheg anggenipun ngangsu kawruh. Panjenenganipun sinau piyambak, panjenenganipun ugi asring kirim layang dhumateng kanca – kancanipun ingkang wonten ing nagari Walandi. Salah satunggaling kanca kenthel Kartini inggih menika Rosa Abendanon, ingkang saestu nyengkuyung gegayuhan Raden Ajeng Kartini kangge majengaken nasib tiyang estri.

Rikala jaman semanten, tiyang estri naming macak, manak, masak. Pramila, boten wonten tiyang estri ingkang saged maos, nyerat, lan sapanunggalanipun. Kahanan menika benten kaliyan penggalihipun Raden Ajeng Kartini, bilih wanita dados kunci suksesing kulawarga. Amargi ingkang nata lakuning bale wisma lan ingkang nggulawenthah saha nyithak kapribaden para putra generasi penerusing bangsa tamtu tiyang estri. Lha menawi tiyang estri cubluk, badhe dados menapa generasi penerus bangsa samangke? Menika ingkang dados pro lan kontra wonten ing salebeting manah Raden Ajeng Kartini.

Tanggal 12 November 1903, ing yuswa 24 taun, Raden Ajeng Kartini kadhaupaken kaliyan Bupati Rembang Kanjeng Raden Mas Adipati Ario Singgih Djojo Adiningrat ingkang sampun kagungan garwa tiga. Kaliyan ingkang garwa, Raden Ajeng Kartini dipunparingi kalodhangan saha dipunsengkuyung kangge mujudaken gegayuhanipun kanthi damel pawiyatan kangge para putri. Pawiyatanipun menika mapan ing Komplek Kabupaten sisih wetan.

Tanggal 13 September 1904 Raden Ajeng Kartini mijilaken ingkang putra ingkang asma Soesalit. Mbok menawi sampun dados titahing Pangeran ingkang Akarya jagad, sekawan dinten sasampunipun babaran inggih menika tanggal 17 September 1904, Raden Ajeng Kartini tinimbalan ing ngarsanipun Allah ing yuswa 25 taun.

Sinaosa boten dangu anggenipun menjuangaken nasibipun tiyang estri, ananging ombyaking semangat emansipasi tasih keraos dumugi sakmenika. Tiyang estri kathah ingkang sukses ing babagan karier, ugi kathah ingkang sukses nglantaraken putra putrinipun dados jalma utama ingkang migunani tumprap bangsa lan nagara.

Nuwun