MERAPI ORA NATE NGAPUSI

 

“Merapi ora nate ngapusi”, mengkono pangandikane Kepala Pusat Vulkanologi lan Mitigasi Bencana Geologi, Bapak Surono. Sakwise diundhakke status dadi siyaga, Merapi nglunasi janjine kanthi mutahake awan panas kanthi wektu kang suwe. Gunung Merapi kang dhuwure 1930 meter lan manggon ing Sleman njeblug, ngetokake awan panas (wedhus gembel) lan lahar adhem. Wedhus gembel nggerus apa wae kang dilewati kalebu daleme Mbah Maridjan ing Dhusun Kinahrejo, Cangkringan, Sleman kang jarake kurang luwih 4 km saka puncak Merapi.

Mbah Maridjan kanthi asma asli Mas Penewu Suraksohargo dados guru kunci Gunung Merapi wiwit tahun 1982. Saben Merapi arep njeblug warga ngenteni komandho saking Mbah Maridjan prelu ngungsi utawa ora.

Nalika status Merapi mundhak, kurang luwih 40.000 warga pindhah ing pengungsian, ananging Mbah Maridjan kanthi tetep ati nulak mudhun saka Merapi. Mbah Maridjan setya tuhu nunggoni Gunung Merapi senajan mbebayani. Galake wedhus gembel saka merapi mingkes gesange Mbah Maridjan. Mbah Maridjan seda diantem awan panas 600 derajat celcius kanthi kahanan sujud manembah Mring Kang Kuwasa.

Dhusun Kinahrejo entek ora ana tilase, omah – omah rusak, tetanduran gosong, kewan – kewan uga padha mati lan awan panas krasa ing sakupenge dhusun kuwi. Sakwisse pirang – pirang ndina ngamuk nyemburake awan panas, Merapi banjur mbalik turu angkler. Sanajan kahanan wis ora mbebayani, ananging Bapak Surono tansah ngelingke para korban gunung njeblug supaya tetep waspada lan ngati – ati.